Третиот бран на коронавирус во Германија може да се претвори во најлош досега со потенцијални 100.000 нови случаи на ден, изјави денеска директорот на германскиот институт Роберт Кох (РКИ) Лотар Вилер.

Бројот на нови потврдени зарази со коронавирус во Германија скокна во последните неколку недели, предизвикани од позаразната варијанта на вирусот позната како Б117 и од првите чекори за ублажување на некои ограничувања на заклучувањето, наведува „Ројтерс“.

„Постојат јасни сигнали дека овој бран ќе биде полош од првите два брана“, рече Вилер, повикувајќи ги луѓето да останат дома за време на Велигден и додаде: „Ни претстојат многу тешки недели“.

Министерот за здравство Јенс Шпан на истата прес-конференција рече дека Германија е во завршна фаза од пандемискиот маратон, но предупреди дека здравствениот систем во земјата може да ја достигне својата граница во април.

Бројот на нови случаи на коронавирус во Германија денес се зголеми за 21.573, додека бројот на смртни случаи се зголеми за 183.

Шпан рече дека од понеделник ќе стапи на сила барањето со кое сите патници на авиокомпаниите што влегуваат во Германија мора да имаат негативен тест на коронавирус.

Тој исто така ги повика локалните власти да преземат пофлексибилен пристап кон вакцинирањето, на пример, нудејќи неискористени дози на вакцина на постари од 70 години за време на викендот или побрзо намалување на залихите.

Околу 10 проценти од Германците сега ја примиле барем првата доза, но тоа е далеку помалку отколку во земји како САД, Велика Британија или Израел, пишува „Ројтерс“.

 

makfax.com.mk