Францускиот премиер Жан Кастекс нареди еден месец целосно затворање на Париз и на неколку други региони поради забрзаното ширење на коронавирусот.
Кастекс изјави дека поострите мерки се воведуваат поради забрзаното ширење на вирусот, а ден претходно соопшти дека Франција влегла во третиот бран на пандемијата.
„Дојде време да одиме понатаму со построги ограничувања, онаму каде што работите се најкритични“, рече францускиот премиер.
Се воведува општо затворање во 16 најтешко погодени департмани, од вкупно 101. Меѓу нив се Париз и неговата околина, како и делови од северот на земјата.
Новите мерки стапуваат на сила на полноќ.
Училиштата остануваат отворени, а на жителите исто така им е дозволено да вежбаат на отворено во радиус од 10 километри од нивниот дом. На Французите нема да им биде дозволено да патуваат во други делови на земјата без оправдана причина.
Франција во четвртокот имаше 35.000 новозаразени и 268 смртни случаи. Барем една доза од вакцината примиле околу 5,3 милиони жители, покажуваат официјалните владини податоци.
makfax.com.mk
