ЕУ и американскиот милијардер Бил Гејтс планираат да соберат милијарда долари преку заеднички инвестициски фонд за воведување на технологии со ниско ниво на јаглерод.
Овие технологии и се потребни на Унијата за постигнување на целите за климатските промени.
„Овие средства ќе бидат насочени кон производство на водород од обновливи извори на енергија, одржливи горива во авијацијата, технологии за отстранување на СО2 од атмосферата и долгорочно складирање на енергија“, објави денеска Европската комисија, пренесува Ројтерс.
Гејтс во изјавата рече дека декарбонизацијата на глобалната економија е најголемата можност за иновации што светот ги видел и дека очекува Европа да има клучна улога во процесот, благодарение на климатските амбиции и лидерството во науката и технологијата.
ЕУ се обврзува да има нула емисии на штетни гасови до 2050 година, а овие инвестиции ќе се насочат и на градење големи комерцијални проекти за намалување на трошоците за воведување нови технологии.
Тие ќе вклучуваат грантови и други финансиски инструменти, со придонеси на ЕУ кои доаѓаат од постојните фондови, вклучувајќи го буџетот на Унијата и Фондот за иновации на ЕУ и компанијата Гејтс „Breakthrough Energy Ventures“ кои ја поддржуваат истата сума преку фондот „Breakthrough Energy Europe“ (БЕE), од 2022 до 2026 година, заеднички обезбедени до 820 милиони евра или една милијарда долари.
