Германската полиција истражува дали пожарот што избувна на градилиштето на огромната фабрика Тесла, компанија во сопственост на милијардерот и иноватор Елон Маск, бил подметнат од политички мотиви, пренесува Ројтерс.
Пожарот избувна утрово во близина на Берлин, во градот Гринхајде во сојузната покраина Бранденбург. Огнот оштетил неколку напонски кабли што би биле поставени во близина на градилиштето на огромната фабрика на Тесла, т.н. гигафабрика, прва од ваков вид во Европа.
Портпарол на обвинителството изјави дека подметнување пожар не е исклучено, додавајќи дека истражителите го проверувале писмото што се појави на Интернет во средата, во кое радикални левичарски активисти ја преземаа одговорноста за пожарот
Писмото е објавено на интернет-платформата на радикалната левица и во него стои дека напојувањето со електрична енергија до градилиштето било прекинато, така што биле запалени шест високонапонски кабли.
„Тесла не е ниту зелена ниту еколошка“, се вели во писмото.
Тесла, која претходно најави дека во оваа фабрика ќе се произведуваат 500.000 автомобили од својот модел Y годишно, го одложи отворањето на фабриката за крајот на 2021 година. Првично фабриката требаше да се отвори на 1 јуни, но подоцна тие одлучија да произведат и батерии во таа фабрика.
Основачот на Тесла, Елон Маск, претходно се пожалил на германската бирократија дека го одложува процесот на добивање на потребните дозволи за изградба на фабриката по поплаките од активисти за заштита на животната средина кои се загрижени за влијанието на фабриката врз животната средина.
