Јасно е - Финска и Шведска сакаат да влезат во НАТО. Јасно е и дека Турција не го сака тоа, а сега може да се случи таа земја да биде исфрлена од членство во Алијансата.
Колумнистот на Си-Ен-Ен, Дејвид Анделман изјави дека веќе имало многу размислувања за исфрлање на Турција од НАТО, особено откако турскиот претседател пред три години купил руски системи за противвоздушна одбрана С-400.
Во исто време, тој вели дека таквиот потег може да ја ослаби позицијата на НАТО во стратешки важен регион.
„Малкумина сакаат да ризикуваат да ја загубат најголемата постојана армија по САД од НАТО, особено онаа што го контролира стратешкиот Босфор и има пристап до Црното Море“, истакна новинарот на Си-Ен-Ен.
Од друга страна, министерот за надворешни работи на Луксембург, Жан Аселборн, вели дека не верува оти Турција ќе го блокира влезот на Финска и Шведска во НАТО и покрај изјавата на турскиот претседател.
Да потсетиме, секоја од 30-те земји-членки на Алијансата мора да даде согласност за влез на Финска и Шведска во НАТО. И Ердоган ги прекорува двете нордиски земји дека покажале попустливост кон курдските бунтовници на Курдистанската работничка партија (ПКК), која Турција ја смета за терористичка организација.
Дополнително, Турција и замерува на Шведска дека ја прекинала продажбата на оружје за неа од 2019 година, како мерка на одмазда поради турската операција во северна Сирија.
„Како ќе им веруваме? Шведска претставува јасли за терористички организации... Нема да попуштиме пред влезот во НАТО на оние кои применуваат санкции кон Турција“, рече турскиот претседател.
Сепак, Аселборн истакна дека Ердоган сака само да ја „подигне цената“ на пристапот на двете земји. „На крајот на краиштата, убеден сум дека Турција не може да го спречи тоа“, рече министерот.
Во меѓувреме зборуваше и финскиот претседател Саули Нинисто, кој рече дека Финска и Шведска ќе можат да постигнат договор со Турција за приговорите на Анкара за влез на двете нордиски земји во НАТО.
„Изјавите од Турција се променија многу брзо и станаа посериозни во претходните денови. Но, сигурен сум дека со конструктивен дијалог ќе ја решиме ситуацијата“, тврди Нинисто, пренесува Ројтерс.
