Лидерката на американскиот Конгрес Ненси Пелоси денеска слета во Тајван, со што стави крај на неколкудневните шпекулации дали посетата ќе се одржи. И покрај најавите, Кина не реагираше активно на оваа провокација на Пелоси, која долго е трн во Пекинг, пред се, поради нејзиното инсистирање за наводно кршење на човековите права.
Пекинг претходно предупреди дека САД „ќе ја платат цената“ доколку Пелоси го посети Тајван, додека кинескиот министер за надворешни работи Ванг Ји во вторникот рече дека оние американски политичари кои „играат со оган“ по прашањето за Тајван „нема да завршат добро“.
Во услови на зголемени кинески предупредувања за посетата на Пелоси, четири американски воени бродови, вклучувајќи го и носачот на авиони УСС Роналд Реган, беа позиционирани во водите источно од Тајван на „рутинско“ распоредување.
