logo
logo
logo

Виктор Давидовски добива тимски колега, се проширува „ергелата“ на ПСС Рејсинг!

Vecer | 24.03.2021

Виктор Давидовски добива тимски колега, се проширува „ергелата“ на ПСС Рејсинг!

Македонскиот автомобилист Виктор Давидовски, кој самостојно настапува во првенството ТЦР Европа, од 2021 година покрај себе ќе има тимски колега со кој ќе се обидат заедно да стигнат до поголеми успеси.

Екипата „ПСС Рејсинг” вчера преку својата ФБ-страница соопшти дека на тимот му се приклучува Аргентинецот Франко Џиролами, а обајцата ќе возат Хонда Сивик.

За Давидовски ова ќе биде четврта сезона во ТЦР шампионатот, додека Џиролами досега се натпреваруваше во својата татковина. Постариот брат на Франко, Нестор Џиролами, претходно стекна светска слава со победи во светското ТЦР првенство, каде што возеше за Волво / Полестар. Минатата година, кога поради пандемијата со Ковид-19 на Давидовски не му беше дозволен влез во Франција, Нестор Џиролами настапи за „ПСС Рејсинг”, при што освои едно второ место. Во последната трка од 2020 година, Франко Џиролами за прв пат доби шанса да вози во Европа, токму со „ПСС Рејсинг” на патеката Харама во Шпанија, по што уследи и договорот за продолжување на заедничките настапи во 2021 година.

Ланската сезона иако беше проблематична, воедно беше и најуспешна за Виктор Давидовски, кој на два пати го освои „Трофејот Јокохама” и се најде на подиумот. Подготовките за новата сезона се во тек, а Давидовски ќе биде присутен на три тестирања што ќе се случат претстојниов период: 27/28март во Спа Франкоршамп, 1 април на Нирбургринг и 2 април на Зандворт.

Првата трка од ТЦР Европа е закажана на 8 мај,а ќе се вози на патеката крај Братислава,во Словачка.

 

sportmedia.mk

© Vecer.mk, правата за текстот се на редакцијата

logo

Vecer.mk е прв македонски информативен портал, основан во 2004 година.

2004-2024 © Вечер, сите права задржани

Сите содржини и објави на vecer.mk се авторско право на редакцијата. Делумно или целосно преземање не е дозволено.

Develop & Design MAKSMEDIA LTD Skopje Copyright © 2004-2024. Vecer.mk