Веспрем стави крај на серијата од три порази во низа. Очекувано, унгарскиот тим на гостувањето кај Целје славеше со 25-29 и ја запиша седмата победа сезонава со која останува на второто место на табелата во групата Б зад Барселона.

Домаќинот пружи отпор во првиот дел, до средината на првото полувреме беше изедначено (7-7). Веспрем со серија од 3-0, поведе со 7-10, на одморот беше 14-16. Во продолжение, ракометарите на Целје не успеаја да го задржат ритамот, Веспрем сигурно чекореше кон триумфот.

Македонскиот репрезентативец, Дејан Манасков постигна два гола од пет обиди, сите во првото полувреме.

Барселона дојде до 11 победа во исто толку одиграни мечеви. ППД Загреб ја искористи опуштеноста на каталонскиот тим, имаше водство од два гола(5-3, 7-5). Барселона набрзина дојде на плус шест 10-16, на полувремето беше 18-21.

Во второто полувреме, ППД Загреб на двапати успеа да израмни, но шпанскиот тим притисна и лесно дојде до нова убедлива предност за мирен финиш и триумф од 33-37.

sportmedia.mk