Готово е. Нема веќе теории, нема веќе математики, нема веќе никакви шанси. Од денеска Вардар и официјално е второлигаш. И тоа се случи. Вардарци во минатата сезона беа шампиони, а во оваа испаднаа од ПМФЛ.

Она што можеше да се очекува уште на стартот на пролетниот дел, еве денеска и се оствари. Вардар попладнево загуби од Струга Трим Лум во Струга и со тоа стави “печат“ на испаѓањето во понизок ранг.

Секако дека ова е голем удар за сите вардарци, ова е голем удар за кој оној кој навива за Вардар. Но тоа е тоа, на Вардар едноставно не му се даде шанса да се спаси.

По ова коло и дефинитивно се знае дека Беласица и Вардар во следната сезона ќе играат во Втората лига, додека Ренова, Силекс и А. Пандев ќе стравуваат и во последното коло да не одат во баражот за опстанок. “Пандевци“ се во најдобра позиција, играат дома со Борец и им треба победа за избегнување на баражот.

Колку за потсетување, Вардар, Силекс и Ренова заедно “тежат“ 15 титули шампион на Македонија.

Но, ова се некои нови времиња, кои очигледно е дека не признаваат некогашни шампиони.

sportmedia.mk