Денеска од 13 часот се игра соседското дерби бр.73. Вардар и Работнички ги одмеруваат силите, но со различни мотиви. На Вардар му се потребни и тоа како во битката за опстанок, додека Работнички влезе во “црна серија“ по двата порази едноподруго од Шкупи и Шкендија. Исто така тимот од Дебар Маало има и дополнителен мотив, веќе 2.5 години не знае за победа над Вардар. Последен пат тоа се случило на 22 ноември 2018 година.

Нема многу дилеми за овој меч, барем од аспект на вардарци. Ако победат тогаш остануваат во игра за опстанок, ако загубат веројатно ја губат и последната шанса за спас.

Интересно, некогаш овие два клуба водеа битки за шампионските пехари, за излез во Европа, а сега едниот е пред испаѓање а другиот веќе трета сезона по ред не може да избори пласман во Европа.

Сепак, се очекува да биде интересно попладнево на Арената. Кога играат Вардар и Работнички никогаш ништо не се знае однапред.

sportmedia.mk