Репрезентацијата на Германија се пласираше во осминафиналето на ЕУРО 2020, но сепак селекторот Јоаким Лев е мета на жестоки критики во тамошната јавност.

Дел од најугледните новинари и медиуми му се нафрлија на селекторот за играта и резултатите, особено последниот меч со Унгарија кој го нарекоа срамен.

„На овој начин нема да стигнеме далеку. Поминавме понатаму, но никој не знае зошто!“, пушува еден од најтиражните европски весници, „Билд“.

Главниот уредник на магазинот „Кикер“, Карлхајнц Вајлд, ја опиша изведбата на „Елф“ против Унгарија како „дива, збунета и разнишана“.

„Националниот селектор изгледаше стресно. Голот на Горецка го спаси од срамното испаѓање. Одбраната продолжува да прави ужасни грешки, дури и голманот Нојер веќе ја нема вообичаената сигурност. Некои од неговите колеги се премногу колебливи во нивниот настап. Дали Серж Гнабри го заслужува своето место? Или Гундоган? Каде исчезна тој голем Госенс ​​од мечот со Португалија? И каква работа имаше Рудигер, кој секогаш беше слободен, но стоеше само околу линијата на центарот. Многу прашања за кои се потребни брзи одговори“, анализира новинарот на „Кикер“.

Германската веб-страница „Спорт 1“ пишува дека на одбраната и недостасува шеф да воведе ред, а Кимих, за разлика од Баерн, сега е сместен на позиција на која има далеку помало влијание.

 

sportmedia.mk