Францускиот напаѓач Килијан Мбапе го пропушти тренингот на својот тим во вторникот, пренесува „Л’Екип“.

Од таборот на „триколорите“ истакнуваат дека нивниот најдобар играч „во затворен простор се опоравувал од мечот со Полска“, односно дека работел во сала за опоравување и дека тоа е класична ситуација два дена по последниот меч.

Сепак, медиумите од островот, кои посветија големо внимание на овој детаљ, не мислат така. Токму против Англија игра Франција во четврт-финалето на Мундијалот, а сигурно е дека нивниот противник се надева дека Мбапе нема да биде на тој меч.

Во прилог на тоа оди и фактот што на тренингот беа сите актери на мечот со Полска, освен напаѓачот на Пари Сен Жермен. Француските фудбалери во понеделникот имаа слободен ден.

Актуелниот светски првак Франција во сабота од 20 часот ќе игра против Англија во четвртфиналето на Светското првенство во Катар.

Мбапе се пожали на повреда на зглобот непосредно пред Мундијалот, но се чини дека тоа досега не му направи премногу проблем. Мбапе на четири натпревари во Катар веќе постигна пет гола, а има и две асистенции.