Штета, голема штета. Работнички не успеа да дојде до нова победа во АБА 2-лига и покрај тоа што успеа да се врати од негатива од 20 поени. На првиот меч на турнирот во Златибор, македонскиот тим беше совладан од фаворитот Борац Бања Лука со 77-82. Со овој пораз, Работнички направи чекор назад во битката за опстанок.
Во првата четвртина „црвено-белите“ имаа водство, најголемото беше плус четири (7-3). На другата страна противникот успеа да го заврши овој период во своја корист (17-20).
Избраниците на Димитар Мираковски беа рамноправен противник до 14. минута, по која противникот со 10-0 поведе со 28-38. На полувремето Работнички имаше негатива од 32-46. Не смени што ниту во следниот период, Борац во решавачките десет минути влезе во предност од 50-70.
Не ги исплаши оваа негатива, со неверојатна серија од 18-0 намалија на 68-70, а со поените на Бундовиќ поведоа со 77-76 на 50 секунди до крајот за драма. Работнички не искористи нападот по тројката на противникот за 77-79. На другата страна следеше казна, а немаше ниту време за евентуално продолжение.
Работнички следниот меч го игра во среда против Хелиос.
sportmedia.mk