Откако минатата недела стигна информација дека УЕФА се подготвува ЕУРО 2020 да го организира само во Англија, денеска на точно 100 дена до почетокот на првенството, стигна и официјалниот став на УЕФА. Според ставот на Европската куќа на фудбалот, тие имаат кристално јасна цел по тоа прашање.

„Бидејќи е објавено дека турнирот ќе се одржи во 12 земји, намерата на УЕФА останува да се одржи во 12 земји“, потенцираат од Нион.

И британскиот премиер Борис Џонсон денеска потврди дека континенталниот шампионат нема да се одржи само во Англија.

„УЕФА е решена да го одржи ЕУРО 2020 во 12 европски градови според распоредот договорен минатото лето. Нема други планови”, соопшти и ФА.

Според планот кој останува во сила, Европското првенство треба да се игра во Амстердам, Баку, Билбао, Букурешт, Будимпешта, Копенхаген, Даблин, Глазгов, Лондон, Минхен, Рим и Санкт Петербург. Градовите имаат рок до 5 април да го потврдат својот статус на домаќин и да го утврдат точниот број на гледачи кои ќе можат да присуствуваат на натпреварите.

sportmedia.mk