Е.Пелистер на стартот на сезоната јавно го нападна тронот на Вардар. Битолчани под водство на Жељко Бабиќ изгадија ростер за високи дострели. Во Европа ги оправдаа очекувањата, ја минаа групната фаза и се најдоа во осминафиналето, но таму уште по првиот меч капитулираа пред силниот Магдебург и покрај најавите на хрватскиот стратег дека во Битола никој не минува лесно.
Но, ајде тоа е Европа.
По овој пораз добија уште еден голем удар, Вардар 1961 во првото дерби ги симна од облаци, им одржа шампионска лекција, им порача дека за титула се потребни дела, не зборови. Убедливиот пораз од 35-27 и немоќта на теренот, оправдано го налути раководството на Е.Пелистер, а се чини Бабиќ полека ја губи нивната доверба, некомплетниот ростер не треба да биде никакво оправдување за немањето на тактички одговор на добро поставената игра на Стевче Алушовски, кој целосно го надмудри противникот.
На социјалните мрежи веднаш по поразот, се огласи и претседателот на клубот, Зоран Стерјев, со три зборови го опиша она што го виде во СЦ „Јане Сандански“: МИЗЕРНО, НЕДОЛИЧНО, ЛОШО!
Овој коментар е на место, особено кога доаѓа од човекот, кој вложува премногу во Е.Пелистер. Точно е дека битката за титулата не е загубена, но се чини за ваква игра нема оправдување. Ова не е тимот за кого Стерјев и останатите кои се дел од раководството вложија голема сума на пари.
sportmedia.mk