Попладнево на Арената “Тодор Проески“ во Скопје, со почеток од 14 часот екипите на Работнички и Силекс ќе го “отворат“ 20.коло во ПМФЛ. Од сите шест средби, само оваа се игра денеска, останатите утре.
Работнички по онаа победа на стартот пролетва во Струмица над Академија Пандев секако дека посакува и втор триумф. И има право на таква надеж, зошто “романтичарите“ покажаа дека се во форма и дека имаат одличен тим, кој денеска ќе биде ослабен со неиграњето на повредениот Драган Стојков. Работнички се уште се надева дека со добра серија ќе може, барем ако не друго, да го загрози тоа трето место на Македонија ЃП кое води во Европа. И за тоа потребни се денешните бодови.
Силекс пак загуби од Шкендија, иако играше добро сепак кратовци имаат и тоа какви проблеми во одбраната, посебно при прекините. Силекс важи за тим против кого тешко се игра, квалитетен е тоа состав, и затоа со право кратовци сакаат да вратат нешто од “загубените“ бодови против Шкендија.
Кога станува збор за традицијата меѓу овие две екипи, таа е на страната на Работнички. Досега одиграле вкупно 66 официјални мечеви, скопскиот тим има 34 победи, 13 пати се играло без победник а кратовци пак имаат 19 триумфи. Гол разликата е 107:65 во корист на Работнички.
sportmedia.mk
