Динамо Загреб е во четвртфиналето на Лигата на Европа. „Модрите“ го направија најголемиот клупски успех во поновата историја. Адеми и Ристовски, Оршиќ, Ливаковиќ, Маер, Гаврановиќ, Петковиќ… успеаа да му го земат скалпот на големиот Тотенхем, премиерлигашот кој за ненормални пари купува играчи, а пред некоја година беше и финалист во Лигата на шампионите.
Подвигот е историски. Го елиминираа славниот клуб од северен Лондон и покрај тоа што имаа негатива од 0:2 од првиот меч на „Вајт Харт Лејн“. Ова е чудо.
Од Динамо веднаш по мечот се огласија на Фејсбук. Не можеа, а да не ги споделат емоциите.
„Крај! Динамо е во четвртфинале. Го победивме и го елиминиравме Тотенхем со резултат 3:0! Славете, веселете се, историјата е испишана на Максимир, ова ќе го раскажувате на внуците“.

 

sportmedia.mk