Металург одигра уште еден одличен натпревар во рамките на плеј-офот. Ракометарите од Автокоманда беа на ниво на задачата кога беше најпотребно, му се реваншираа на Т.Пролет совладувајќи го со 29-22 (13-12) и останаа во игра за местата кои водат во Европа.
Добрата игра во второто полувреме, во кое царуваше македонскиот репрезентативец, Мартин Серафимов, беше клучна за вториот триумф во плеј-офот, мечот го заврши со шест гола сите во во второто полувреме.
Во првиот дел домашниот состав за нијанса беше подобар, поведе со три гола (6-3 и 7-4). На другата страна гостите со серија од 3-0 израмни на 7-7 воо 18 минута. Металург врати на ист начин за 10-7 по што влезе во серија на грешки, имаше и двајца исклучени ракометари. Тимот на Т.Пролет одлично го искористи овој период, со серија 5-0 за првпат поведе на мечот, во 27 минута беше 10-12. Хорват се погрижи неговиот тим на одморот да замине со минимално водство од 13-12, постигна три гола во низа.
Во вториот дел следеше со серија од 7-1 на Металург за водство од 22-15 во 46 минута. На другата страна Т.Пролет делуваше раштимано, се изгуби целосно, па негативата стигна и на осум гола (24-16). Гостите не реализираа седум метри за да намалат на четири гола, на другата страна следеше казна.
До крајот „металурзите“ без проблем го одржаа водството и заслужено се радуваа на бодовите.
sportmedia.mk