Белгискиот репрезентативен голман Тибо Куртоа ќе ги пропушти последните два квалификациски натпревари од групата Ј за Светското првенство против Казахстан и Лихтенштајн поради повреда, објави Белгиската фудбалска асоцијација.
„Тибо Куртоа попладнево беше на медицински прегледи од страна на медицинскиот персонал на Фудбалската асоцијација на Белгија. Тој нема да биде достапен за претстојните меѓународни натпревари и ќе се врати во Реал Мадрид на понатамошно лекување“, се вели во соопштението.
Белгија гостува во Казахстан на 15 ноември, а три дена подоцна го пречекува Лихтенштајн.
На табелата од Групата Ј, Белгија е прва со 14 бода и натпревар помалку од Македонија, која има 13 бода.
