Силекс со 6:0 успеа да го победи Вардар во една од пресудните битки за опстанок во ПМФЛ. Сите очекуваа победа на кратовци, но ретко кој можеше да претпостави дека Силекс буквално ќе го столчи нашиот најтрофеен клуб и веројатно ќе го прати во Втората лига.

После натпреварот свој коментар за СПОРТМЕДИА имаше тренерот на Силекс, Горан Симов.

Нам овој меч ни беше од животно прашање. Оваа победа ни беше многу, многу потребна. Затоа и така влеговме во мечот, максимално ангажирано, со цел да победиме и да ги освоиме тие три бода. Секако дека сум среќен по една ваква победа. Сега атмосферата во тимот е одлична по двата последни меча и победи над Струга Трим Лум и Вардар, сега полесно се дише во Силекс. Дали можевме да запреме на 3:0? Тоа беше вашето прашање? Видете, Силекс и јас како тренер никогаш не сме калкулирале. Игравме да победиме и тоа е тоа. Јасно е дека како некогашен играч на Вардар мене ми е жал за тоа што сега се случува во тој клуб, но Силекс тука е немоќен“ заврши Симов.

sportmedia.mk