Манчестер Сити ја заврши серијата од 21 победа по ред во Премиер лигата. „Граѓаните“ беа спуштени на земја и тоа од градскиот ривал Манчестер Јунајтед на својот „Итихад“. Четата на Оле Гунар Солскјер ги освои бодовите од ова гостување со победата од 2:0.

Уште во втората минута изненадување за „Граѓаните“. Бруно Фернандеш од пенал донесе водство за „Ѓаволите“. На пеналот му претходеше прекршок на Габриел Жесус во сопствениот шеснаесетник. Тоа е 17ти гол од пенал на Фернандеш.

Во второто полувреме уште еден удар за лидерот на табелата. Лук Шо, бекот на Манчестер Јунајтед постигна гол за водство на Јунајтед од 2:0. За Шо ова е само втор гол во Премиер лигата воопшто во 180. натпревар. Се чини го избра точниот момент кога да погоди.
Мечот изобилуваше со убави шанси на двете страни, а Сити во двата меча со Јунајтед оваа сезона не успева да запише гол. Да потсетиме во декември на „Олд Трафорд“ немаше голови.

Сити и понатаму е лидер со 65 бодови, а Јунајтед скокна на второто место со 54 бодови. Лестер е трет (53)…

sportmedia.mk