Уште еден одличен натпревар од главната фаза на Европското првенство. Исланд и Хрватска ги видовме во две различни лица, на крајот победата отиде на контото на „коцкестите“ и тоа благодарение на Анте Гаџа во самиот финиш погоди за 22-23.
Со овој триумф Хрватите ја продолжија доминацијата во пресметките со оваа селекција, истовремено и направија услуга на Франција во битката за полуфиналето на ЕУРО. Олимпискиот првак игра против Црна Гора со победа ќе го направи главниот чекор кон завршниот викенд во Будимпешта.
Доста интересно е што единствениот погодок вардарецот Гаџа го постигна токму за победа. Број еден стрелец беше Лучин со шест погодоци, тој и го понесе признанието за играч на мечот, по пет гола имаа Чупиќ и Мартиновиќ. Пешиќ блескаше со 13 одбрани. На другата страна Поркелсон имаше шест гола.
Исланд доминираше во првото полувреме, поведе со 3-1 во деветата минута, па со 7-4, па 8-4. На спротивната страна хрватските ракометари делуваа загубено, серија од три грешки во низа, ги чинеше негатива од пет гола 9-4 беше во 19. минута. По 10-5, Иван Чупиќ влезе во серија на успешно изведени пенали (вкупно четири), а неговата репрезентација тивко го „делкаше“ водството на противникот, на одморот успеа да намали на 12-10.
Оваа игра ги подигна Хрватите, предводени од одличниот Пешиќ, кој блескаше на голот, во првите 15. минути од вториот дел направија серија од 9-2 и поведоа со 14-19, најголемо водство на дуелот, во форма беа Срна, Мартиновиќ, Лучин и Мариќ. На другата страна Исланд влезе во поентерска криза, третиот гол го постигна во 45. минута за 15-19.
По 15-20, „рибарите“ се разбудија и со серија од 7-1 поведоа со 22-21 во 55. минута, го казнија невниманието и брзоплетоста на Хрватите. Пешиќ со две одбрани во низа, спречи противникот да отиде во поголема позитива, додека неговите соиграчи имаа серија на технички грешки.
Нациновиќ израмни на 22-22 за голема драма. Исланд промаши од чиста позиција, на другата страна Гаџа погоди за 22-23, слободниот удар на противникот не заврши во мрежата на Пешиќ за голема радост.
