logo
logo
logo

На 26 јуни во Скопје

Васил Гарванлиев ќе застане на чело на втората ПАРАДА НА ГОРДОСТА

Vecer | 15.06.2021

Васил Гарванлиев ќе застане на чело на втората ПАРАДА НА ГОРДОСТА

Васил Гарванлиев ќе застане на чело на вториот прајд во земјава, кој под мотото „Вон ѕидовите“ ќе се одржи на 26 јуни во Скопје. Втората парада на гордоста е во организација на Националната мрежа против хомофобија и трансфобија.

Кочо Андоновски, член на организацискиот одбор, денеска на прес-конференција рече дека одлучиле годинава да се одржи втората парада откако спласна пандемијата и мерките се олабавени. Посочи дека парадата ја посветуваат на сите нивни поддржувачи, кои ќе присуствуваат на неа и на сите кои нема да присуствуваат поради различни причини.

Извршната директорка на Хелсиншкиот комитет, Уранија Пировска рече дека поучени од првата парада, што се одржа пред две години уште пред десеттина дена одржале средба со министерот за внатрешни работи и добиле потврда за посветеноста која ќе ја има МВР за да се обезбеди највисоко ниво на сигурност на сите учесници на парадата.

– Пред две години нашата парада која беше прва во нашата земја беше оценета како најдобра парада во регионот токму поради безбедносниот аспект. Покрај големиот број полициски службеници кои беа присутни на самата парада нивната видливост беше многу мала, што на учесниците на парадата им овозможи да се чувствуваат слободни, но сепак сигурни. Очекувам дека МВР и оваа година на оваа парада своите обврски со цел да бидеме безбедни и сигурни во славењето на гордоста ќе ја покаже својата професионалност и ќе им овозможи на сите учесници да се чувствуваат пријатно, потенцира Пировска.

Таа посочи дека уште по првото соопштение дека ќе се одржи втората парада на 26 јуни веднаш се соочиле со високо ниво на говор на омраза, како што тоа било случај и пред две години, како и кога одржуваат настани поврзани со ЛГБТИ заедница. Додаде дека сите такви случаи, како и досега, ќе ги пријавуваат во МВР.

Активистката Елена Петровска информираше за деталите околу организацијата на овој настан. Посочи дека собирањето на учесниците на парадата ќе биде од 10 до 12 часот на 26 јуни во Жена парк, од каде тие ќе се движат по улиците, ќе поминат покрај Владата и крајната точка е Школка во Градскиот парк, каде ќе почне прославата со цел да испратат пораки за тоа што го бараат и што е приоритет на луѓето од ЛГБТИ и да покажат дека ги реафирмираат надежите за посолидарно, похумано, поправедно општество.

– Оваа година прајдот ќе го отвори претставникот на Евровизија од државава, Васил Гарванлиев, по што ќе следат говори од активисти, а ќе има и музичка програма, додаде Петровска.

Портпаролот на МВР, Тони Ангеловски истакна дека МВР ќе ги преземе сите неопходни мерки за настанот да помине безбедно. Посочи дека какво било нарушување на јавниот ред и мир ќе биде најстрого санкционирано и затоа упати апел граѓаните да ги почитуваат законите.

Инаку, Гарванлиев беше дел од ЛГБТ парадата во Бугарија, а пред својот настап им порача на присутните дека „во музиката нема граница, нема омраза, нема политика и дека нема сексуална ориентација, но дека има љубов, енергија и дека сите сме едно“.

[embed]https://www.youtube.com/watch?time_continue=7&v=hsInXzP2oeY&feature=emb_logo[/embed]

© Vecer.mk, правата за текстот се на редакцијата

logo

Vecer.mk е прв македонски информативен портал, основан во 2004 година.

2004-2024 © Вечер, сите права задржани

Сите содржини и објави на vecer.mk се авторско право на редакцијата. Делумно или целосно преземање не е дозволено.

Develop & Design MAKSMEDIA LTD Skopje Copyright © 2004-2024. Vecer.mk