Триесет патници од автобус на скопска агенција приложиле фалсификувани ПЦР тестови на граничниот премин "Деве Баир".
Полицијата ги открила 30те фалсификувани тестови кои ги приложиле патници кои се возеле со автобус на туристичка агенција од Скопје, соопшти МВР.
„Полициски службеници од Одделот за гранични работи и миграции откриле 30 ПЦР тестови за ковид-19, за кои постои основано сомнение дека не се валидни, односно дека не се извадени од овластена медицинска установа. Тестовите биле приложени од патниците и по направени дополнителни проверки, биле одземени“, велат од МВР.
По ова, биле приведени двајца албански државјани и биле изведени пред судија на претходна постапка. За другите 28 патници, кои се македонски државјани, од МВР најавуваат дека ќе направат дополнителни проверки и ќе поднесат пријави до Основното јавно обвинителство.
