Претседателот на ВМРО-ДПМНЕ, Христијан Мицкоски вечерва во ТВ дуелот со Зоран Заев во Канал 5 телевизија, во врска со трагедијата во Тетово и побараната оставка од министерот за здравство Венко Филипче, истакна дека оставката е нужна е за да се спасат човечки животи, она кое се случи во Тетово е директна последица на слабостите на системот.
-За да спасиме човечки животи, затоа што ситуацијaта е загрижувачка, 14 човечки животи, 12 пациенти и двајца блиски до пациентите ги загубија своите животи поради неспособноста на надлежните и слабостите на системот кои се резултат на лошото менаџирање на тој систем од страна на надлежните, истакна Мицкоски.
Тој вели дека доколку се поразговaра со роднините кои загубиле свои блиски ќе се увиди сиот гнев и болка затоа што ги загубиле најблиските затоа што тие во болницата отишле по здравје.
-И ако денеска има некој кој има грижа на совест во Владата, а тука најповикан е Зоран Заев не само што нема да размислува туку веднаш ќе ги прифати сите овие оставки, и тоа е првата работа којашто треба да ја направи, а тоа моралната одговорност, а потоа следат и поинакви одговорности, затоа што 14 луѓе ги загубија своите животи, порача Мицкоски.
Мицкоски ја коментираше денешната изјава на Заев, каде што тој директно признава дека немало одобрение за градба на модуларната болница, укажувајќи дека македонската јавност и тој лично е шокиран од изјавите, како и дека не е банално тоа што ВМРО-ДПМНЕ бара оставка бидејќи како што рече 14 човечки животи згаснаа предвреме поради неспособноста на надлежните институции.
Она што исто така би сакал да го споменам и навистина сум шокиран денес, а претпоставувам и македонската јавност е денеска шокирана од изјавата на првиот најповикан а тоа е премиерот Заев кој што рече дека бил свесен и знаел дека таму нема одобрение за градба на тие објекти и како второ тоа што го кажа дека банална е таа работа. Не е банална господине Заев 14 човечки животи згаснаа предвреме поради неспособност, вели Мицкоски.
