Бугарија ја повтори блокадата за Македонија, во ЕУ, се додека не се исполнат нејзините барања. Блокадата беше потврдена на денешниот редовен состанок на Советот за општи работи во Луксембург.

Повторувајќи ја блокадата тие велат дека се отворени за конструктивен дијалог со претстојното словенечко претседателство со Советот на ЕУ за изнаоѓање заемно прифатливи решенија.

Бугарија беше претставена на состанокот на Советот од заменик министерот за надворешни работи на земјата Румен Александров. За време на разговорите се разговараше за моменталната состојба во процесот на проширување на ЕУ, објави бугарското Министерство за надворешни работи.

Како што јави дописникот на МИА од Софија, бугарскиот заменик министер Александров изјави дека Бугарија продолжува со консултациите со  Македонија за спроведување на Договорот за пријателство и добрососедство. Тоа е конструктивно и добронамерно, но, вели, очекуваме Македонија да започне во пракса да ги спроведува преземените обврски на високо ниво на 17 јуни 2021 година во Софија, што ќе ни овозможи да се движиме во позитивна насока.

-Ова вклучува експлицитно откажување на Македонија од територијални, малцински и историски претензии кон Бугарија, промена на натписи / споменици кои создаваат омраза кон Бугарија во Македонија, активирање на процес на рехабилитација на жртвите на Југославенскиот комунизам поради бугарска самосвест. Без оглед на нашиот билатерален дијалог со Македонија, Бугарија инсистира на тоа спроведувањето на Договорот за добрососедство од страна на Македонија да биде вклучено меѓу условите во идната рамка за преговори за пристапување на Скопје во ЕУ, изјави Александров.

Бугарија ги пофали достигнувањата на Албанија во реформскиот процес и ја потврди својата поддршка за усвојување на рамката за преговори за оваа балканска земја.