Македонските граѓани и овој продолжен викенд го користат за вакцинација во соседна Србија. Уште од раните утрински часови имаше редици од возила на граничниот премин Табановце кои се упатуваат кон Врање и Ниш со цел имунизација против корона вирусот.

Откако српската влада дозволи вакцинација за жителите на Македонија без закажување ваквите слики се честа појава бидејќи земјава има недостиг на вакцини. И додека Македонија ги очекува 500.000 вакцини, или тие 2 милиони, граѓаните чарето си го бараат во Србија, каде што дури имаат можност и да бираат со која вакцина ќе се вакцинираат.

Според изјавите на тие кои се вакцинирале во Ниш и Врање, најчестиот избор е Фајзер, не само поради високата ефикасност, туку и поради можноста за патување бидејќи оваа вакцина е призната во Европската Унија.