„Огнената група“ официјално ја започна битката внатре во ДУИ. Тие испратија писмо до лидерот на партијата Али Ахмети, барајќи остранување на Артан Груби од позициите, кои ги има моментно, и наведувајќи дека во последните две години во партијата не постојат и не се формирани партиски тела, додека донесувањето одлуки станало индивидуална сопственост.
„Огнената група“ во ДУИ е се помасовна група на „внатрешно-партиски дисиденти“- незадоволници со сериозно влијание во партиските редови. Водечки личности во „Огнената група“ се партискиот потпретседател Изет Меџити, поранешниот министер за правда Блерим Беџети, Садула Дураку, поранешниот вицепремиер и други високи и влијателни партиски функционери.
Телевизијата „Шења“ и други медиуми на албански јазик, го пренесуваат „Писмото“, кое „Огнената група“ му го испрати на Али Ахмети и во кое се истакнува: „Имајќи ја предвид организациската состојба, создадена во ДУИ во период од две години, должни сме да го кренеме гласот и да реагираме… ДУИ е партија … со внатрешни консултации, без индивидуални привилегии и со статутарни органи. Дефинитивно мора да ја вратиме таму каде што и е местото.“
„Констататираме: ‘Во ДУИ речиси две години не постојат и не се формирани партиски органи! Поради тоа, политичкото одлучување стана индивидуална сопственост. Нема расправа и консултација со партиските бази. Кадровските избори станаа привилегија на Артан Груби! Нема одговорност за работата на Владата и политичката програма близу две години! Поради нефункционалноста на организацискиот живот во ДУИ се намалува поддршката за партијата (последните избори во Тетово)!“
„Концентрацијата на политичката, програмската и кадровската моќ на поединецот, арогантното и дилетантско однесување на извршната власт на чело со Артан Груби и исклучувањето на заслужните структури од политичкото одлучување предизвикаа незадоволство, револт и пасивност на структурите и гласачите!“
„Поради овие причини бараме од претседателот на ДУИ Али Ахмети да ги искористи своите политички и статутарни овластувања за изнаоѓање решение за зачувување на партиското единство. Бараме политичка расправа внатре во партијата за надминување на оваа состојба, како и одговорност и полагање сметка од страна на носителите на извршната власт“ – се нагласува во писмото, кое „Огнената група“ му ги испрати на лидерот на Али Ахмети, поправо повторувајќи го своето барање уште од пред извесно време: да се отстрани Артан Груби од позицијата, што ја има во ДУИ, но и од позицијата, која ја има во Владата.
„Писмото“ на „Огнената група“ упатено до Али Ахмети до овој момент содржи потписи од 20 раководни и други високи функционери на ДУИ.
