Од утре е најавено дека ќе стартува и вакцинирањето на граѓаните кои се помлади од 75 години и кои се пријавени преку страницата vakcinacija.mk или преку матичните лекари. Термини прво, како што најави министерот Филипче, ќе добијат оние од Скопје бидејќи притисокот во главниот град бил најголем.
Тој уште истакна и дека во текот на денешниот ден има повторно тренд на намалување на бројот на новодијагностицирани случаи со Ковид-19, односно тој е околу 1000, што потврдува дека епидемиолошката крива е во континуиран пад и тоа, според него, е еден добар податок. Тоа значи дека мерките во рамките на предвидувањата ги даваат своите резултати, изјави денеска министерот за здравство Венко Филипче.
Посочи дека притисокот во болниците е се уште голем со оглед на тоа што се уште има голема бројка на дијагностицирани.
– Во сите јавно-здравствени установи согласно распоредите и прераспределбата на пациенти има слободни болнички кревети и во Скопје на Интерните клиники и во ковид-центарот во Заводот за рехаблитација во Козле, како и во другите градови. Се прави прераспределба на пациенти од другите градови ако треба. Во овој момент се преоптоварени болниците во Куманово и во Битола и тоа на дневно ниво го менаџираме, рече Филипче.
Тој потенцира дека добро се одвива вакцинацијата и заклучно со вчерашниот ден се вакцинирани близу 30 000 граѓани.
– Во салата „Борис Трајковски“ во Скопје денеска завршува вакцинирањето на вработените во критичната инфраструктура со што го заокружуваме тој процес и од утре почнува вакцинацијата на постарите граѓани како надополнување на овој систем кој веќе се спроведува во пунктовите. Тоа значи дека вакцинирањето во сите пунктови во државата и тука во Скопје продолжува со закажување. Фреквенцијата на спроведување е нешто зголемена во изминатите денови и од 700 до 800 вакцинирани дневно, сега има 1000 до 1500 вакцинирани и согласно пријавените термини тоа се спроведува во сите градови, истакна Филипче.
Тој посочи дека од утре ќе започне вакцинирањето и на граѓани на возраст под 75 години, кои се пријавени преку сајтот vakcinacija.mk или преку матичните лекари и тие ќе добијат термини, прво во Скопје, заради тоа што тука е најголем притисокот. Тоа, појасни Филипче, значи дека сите граѓани на возраст од 74 и 73 години кои се пријавиле во следниот период ќе бидат вакцинирани.
– Во овој момент од вакцината „Спутник В“ на крајот од денешниот ден ќе останат околу 2500 вакцини на кои ќе надополниме 2000 вакцини од „Астра Зенека“ од остатокот од 24000, заради тоа што близу 22000 вакцини се распределени и 1000 кинески вакцини кои пристигнаа како донација. Како ќе доаѓаат вакцините така овие системи ќе се надополнуваат, рече Филипче и додаде дека од компанијата „Фајзер“ преку директен договор на 19 и 26 април треба да стигнат по 10.000 дози.
Тој рече дека се сретнал со кинескиот амбасадор, кој презел обврска да направи што може околу приситгнување вакцини од Кина.
– Вчера имаше некое поместување, добивме информација дека тој административен дел во Кина се забрзал. Исто така, очекуваме информација и од Руската амбасада за дополнителни количини на вакцината „Спутник“. Повторно би требало 76.000 дози на „Астра Зенека“ да стигнат до крајот на месецот за што утрово разговарав со претставничката на СЗО. Тоа што значеше помош преку трилатералните договори од ЕУ што ги најавија за месец април, очигледно дека ќе се поместат и според последните најави од утрово, е дека ќе пристигнат во првата недела на мај, истакна Филипче.
Тој нагласи дека се очекува од Кина да стигнат 200.000 вакцини кои ќе бидат распределени по овој систем на вакцинација, што веќе се спроведува ширум државата,
– Ќе работиме во овој период што е пред нас, очекувајќи ги кинеските вакцини што ќе направат најголема промена во динамиката на спроведување на вакцинација и места за масовна вакцинација во уште неколку градови по примерот на салата „Борис Трајковски“, а тоа ќе бидат градовите Куманово, Штип, Кавадарци, Битола, Охрид и Тетово, покривајќи соодветни региони околу овие здравствени домови што може овој процес да го изменаџираат со кадар, додаде Филипче.
