Од денеска, како што е објавено во Службен весник, стапува во сила Уредбата за униформата и ознаките на униформата на полицијата која Владата ја донесе пред една година врз основа на Законот за употреба на јазиците, во главниот град Скопје и во другите општини каде што живеат најмалку 20 отсто граѓани од заедниците.
„Во Градот Скопје, во општините во Градот Скопје и во општините во кои најмалку 20% од граѓаните зборуваат службен јазик различен од македонскиот јазик, ознаките на основната униформа се: натпис "ПОЛИЦИЈА" "POLICIA" "POLICE", натпис "СООБРАЌАЈНА ПОЛИЦИЈА" "POLICIA E TRAFIKUT" "TRAFFIC POLICE", амблем "ПОЛИЦИЈА" "POLICIA" "POLICE", амблем "ГРАНИЧНА ПОЛИЦИЈА" "POLICIA KUFITARE" "BORDER POLICE", амблем во форма на штит со намалени димензии и метална ознака за шапка“, пишува во Уредбата.
Тројазични стануваат и амблемите на единицата за интервентна полиција. Министерот за внатрешни работи Оливер Спасовски лани најави дека најдоцна до март годинава униформите на полицајците ќе бидат двојазични – на македонски и на албански јазик.
„Се спроведуваат сите процедури од март 2023 година полициските униформи да бидат на два јазика. Оваа регулатива стапи во сила осмиот ден откако беше донесена и ќе почне да се применува најдоцна една година од влегувањето во сила, поточно најдоцна на 26 март 2023 година“, изјави Спасовски.
Претходно опозициската Левица поднесе иницијатива до Уставниот суд за оценување на уставноста и законитоста на уредбата со која Владата воведува двојазичност на полициските униформи.
„Сметаме дека ваквата уредба како општ подзаконски акт на владата е во спротивност со Уставот, со други подзаконски акти, со Законот за јазици, Законот за внатрешни работи, како и со Законот за полиција“, соопштија од „Левица“.
Против двојазичните униформи беше и еден од полициските синдикати во земјата.
