МВР за уапсениот функционер: Загрозил истрага, на осомничена под ПИМ мерки и кажал дека ја следат

Mинистерството за внатрешни работи до Основното јавно обвинителство поднесе кривична пријава против Д.С., вработен во кабинетот на министерот за внатрешни работи, поради сомнение за сторено кривично дело предвидено и казниво по член 353 од КЗ "Злоупотреба на службена положба и овластување".

„Пријавениот Д.С. во текот на месец февруари 2018 година, во својство на службено лице, распореден со Наредба, државен советник за полициски и криминалистички работи во Кабинетот на Министерот за внатрешни работи, носител на безбедносен сертификат "државна тајна", со намера да спречи обезбедување докази за водење на кривична постапка, откако со пречекорување на службените овластувања прибавил службена тајна, класифицирана како "Строго доверливо", наведена во две Наредби за примена на посебна истражна мерка, издадени од Основен суд Скопје 1 Скопје, за примена на мерка по член 252, став 1, точка 1 и член 252, став 1, точка 3 од Законот за кривична постапка, кои Наредби биле во тек на спроведување над за него познато лице, на ден 26.02.2018 година во просторија на здравствена установа во Скопје, на средба со лицето над кое се применувале посебните истражни мерки, на директен начин на лицето и ја пренел службената тајна потенцирајќи и дека над нејзе е во тек примена на посебна истражна мерка што е причината за нивната средба и тоа посебна истражна мерка со која и се следат сите нејзини телефонски броеви и дека над истата се применува мерка следење, предупредувајќи ја да престане да го прави тоа што го прави и да биде внимателна, поради тоа што може во текот на наредните денови да биде применета и друга мерка со користење на прикриен агент (андер кавер агент), при тоа свесен за оддавањето на службената тајна побарал од лицето да не го споменува дека од него е добиен податокот дека над истата се спроведуваат посебни истражни мерки, на кој начин пријавениот нанел штета на постапката која што се водела над ова лице попречувајќи да се обезбедат докази битни за таа постапка, со што истиот го сторил кривичното дело „Злоупотреба на службената положба и овластување" предвидено и казниво по член 353 од КЗ", соопштија од МВР.

– Очекувам многу скоро во законски утврдена постапка сомнежот да биде потврден или отфрлен. Оддавање на службена тајна, загрозување и наштетување на кривична истрага се казниви дела. Граѓаните ни ја дадоа довербата да се бориме против криминалот и за било какви потврдeни незаконски активности ќе има нула толеранција. Тоа треба да му биде јасно на секого. Министерството за внатрешни работи нема да толерира загрозување на истраги и постапки. Ова е пораката за секој кој има намера да соработува или да учествува во криминал, без оглед на позицијата која ја има во општеството и институциите- рече министерот Спасовски.

Поврзани

Најнови вести

Коментари