logo
logo
logo

Македонија почнува СТРАТЕШКИ ДИЈАЛОГ СО САД - Подигнување на односите на повисоко ниво

Vecer | 17.05.2022

Македонија почнува СТРАТЕШКИ ДИЈАЛОГ СО САД - Подигнување на односите на повисоко ниво

Владата на денешната 45-та седница ја разгледа и усвои Информацијата за почеток на Стратешки дијалог меѓу  Македонија и Соединетите Американски Држави.

За координатор на процесот за Стратешки дијалог меѓу Македонија и САД го определи министерот за надворешни работи Бујар Османи кој на 2 јуни ќе ја предводи делегацијата на Владата на Република Северна Македонија на отворањето на процесот во Вашингтон во чиј состав ќе бидат и министерката за одбрана Славјанка Петровска, министерот за економија Крешник Бектеши и министерката за култура Бисера Костадиновска Стојчевска.

Стратешкиот дијалог претставува подигнување на односите на повисоко ниво со САД и е од особено значајно во контекст на актуелните безбедносни закани. Во рамките на дијалогот ќе бидат опфатени теми од билатералните односи за соработка во економијата, трговијата, образованието, транспортот, енергетиката, климатските промени, демократскиот развој, борбата против корупција, владеењето на правото, како и безбедносните сегменти од соработката, од миграција, борба против тероризам, па се до справување со организираниот и меѓународен криминал.

Дијалогот ги опфаќа и актуелните безбедносни состојби, соработката на двете земји како НАТО партнери, аспирациите на Северна Македонија за зачленување на ЕУ, претстојното претседавање на земјава со ОБСЕ, нашите заложби во рамки на Самитот за демократија на претседателот Бајден и други теми од интерес.

На оваа своја седница Владата го утврди текстот на Предлог-законот за гаранција на Македонија на обврските по Договорот за заем за финансирање на ТЕН-Т проектот за автопат од Скопје до границата со Косово, кој ќе се склучи меѓу Европската банка за обнова и развој и Јавното претпријатие за државни патишта.

Целта на овој Предлог-закон за гаранција е да се обезбеди финансиската поддршка за проектот, односно изградба на втората подделница која се однесува на останатиот дел од автопатот Блаце – Скопје, во должина од околу 10.5км со што, значително ќе се подобри мобилноста и трговската размена, ќе се подобри безбедноста на патот и ќе се скрати времето на патување, ќе се зголемат можностите за социо–економски развој, како на национално, така и на регионално ниво.

На предлог на Министерството за финансии Владата денеска го утврди и текстот на Предлог-законот за задолжување на Македонија со заем кај Европската банка за обнова и развој по Договорот за заем за финансирање на Регионалниот проект за цврст отпад.

Основната цел на гаранцијата за заем за финансирање на проектот е да го помогне развојот на регионални системи за управување со отпад во Југоисточен, Вардарски, Пелагониски, Југозападен и Полошки регион.

На денешната седница Владата донесе заклучок со кој ги определи заменик-претседателот за европски прашања Бојан Маричиќ и Секретаријатот за европски прашања да обезбедат институционална поддршка на имплементацијата на иницијативите и договорите.

© Vecer.mk, правата за текстот се на редакцијата

logo

Vecer.mk е прв македонски информативен портал, основан во 2004 година.

2004-2024 © Вечер, сите права задржани

Сите содржини и објави на vecer.mk се авторско право на редакцијата. Делумно или целосно преземање не е дозволено.

Develop & Design MAKSMEDIA LTD Skopje Copyright © 2004-2024. Vecer.mk