Дел од балканските држави, меѓу кои и Македонија се најдоа на листата на држави во кои над 50 проценти од возрасните граѓани се изјасниле дека не сакаат да се вакцинираат против коронавирус.

Според податоците, вкупно 53 проценти не сакаат да ја примат вакцината против Ковид-19, покажува анкетата на „Галуп“.

Македонија заедно со Чешка е на деветтото место во светот на ниво на земји каде граѓаните рекле „не“ за вакцинацијата.  Поголем отпор за вакцинација, помеѓу балканските држави покажуваат Косово со 56 отсто, понатаму Босна и Херцеговина и Бугарија 61 отсто.

Според анкетата што ја спроведе „Галуп“, во Македонија, 35 проценти од возрасното население покажале подготвеност за вакцинација. Речиси идентична стапка имаат и другите балкански држави: Србија 35, Албанија 34, Црна Гора 33, Косово 32, БиХ 30 проценти.

Глобално, вакцината доколку е достапна и бесплатна, би ја примиле 68 проценти од возрасните ширум светот. Сепак, во повеќето земји процентот е под 70-90, што според експертите е неопходното ниво на имунизација за да се постигне колективен имунитет.

Подготвеноста на луѓето да примат вакцина варира од земја до земја, од високи 96 проценти во Мјанмар до ниски 25 проценти во Казахстан.

 

 

makfax.com.mk