logo
logo
logo

КОВАЧЕВСКИ НЕ ОТВОРАЛ ТВИТЕР НА СЛУЖБЕН ПАТ: Не ја видел објавата на Вархеји за влегување на бугарските позиции во преговарачката рамка

Vecer | 23.06.2022

КОВАЧЕВСКИ НЕ ОТВОРАЛ ТВИТЕР НА СЛУЖБЕН ПАТ: Не ја видел објавата на Вархеји за влегување на бугарските позиции во преговарачката рамка

Премиерот Димитар Ковачевски на барање на дописничката на МИА од Брисел да го искоментира денешниот твит на еврокомесарот за проширување Оливер Вархеји со кој објави дека во преговарачката рамка влегуваат сите барања на Бугарија, одговори дека не го видел тој твит.

-Не отворам твитер кога сум службено ангажиран. Можеби можам подоцна да ви одговорам на ова прашање, одговори Ковачевски на заедничката прес-конференција со Еди Рама и Александар Вучиќ.

-Да се праша можеби тој што го пишал твитот што значи тоа, додаде тој.

Утринава, непосредно пред Самитот ЕУ-Западен Балкан, додека државниот врв тврдеше дека уште го нема видено францускиот предлог за отворање на преговорите со ЕУ, еврокомесарот ја соопшти мистеријата.

-ЕУ ги сфаќа сите бугарски грижи многу сериозно и тие сега се дел од преговарачкиот процес. Моментот за одговорни одлуки е сега. Западен Балкан треба да биде дел од нашата Европска унија. Заедно ќе бидеме посилни, твитна Вархеји.

Рама иако е разочаран и јавно го искажуваше цел дена своето разочарување затоа што како што рече, ЕУ не може да ослободи две земји киднапирани од нејзината членка Бугарија, сепак во свој стил изрази надеж дека Албанија и Македонија ќе дојдат до членство во ЕУ до крајот на овој век.

© Vecer.mk, правата за текстот се на редакцијата

logo

Vecer.mk е прв македонски информативен портал, основан во 2004 година.

2004-2024 © Вечер, сите права задржани

Сите содржини и објави на vecer.mk се авторско право на редакцијата. Делумно или целосно преземање не е дозволено.

Develop & Design MAKSMEDIA LTD Skopje Copyright © 2004-2024. Vecer.mk