На дилемите кои ги мачат околу 15.000 Македонци кои спасот за вакцинација го побараа во Србија заради задоцнетата набавка од страна на Владата, порталот Фактор побара одговор од Министерството за здравство од каде што им беше посочено дека во текот на оваа недела сите работи околу термините за ревакцинација со АстраЗенека ќе бидат конкретизирани, но само за граѓаните над 60 години.
Во однос на тоа каде ќе го добијат сертификатот по целосно вакцинирање, односно по примени две дози, од Министерството за здравство велат дека без разлика што граѓаните со првата доза се вакцинирале во Србија, ако тука бидат ревакцинирани, овој документ ќе им биде издаден во Македонија. Останатите кои вакцинацијата ќе ја завршат во Србија, таму ќе им биде издаден сертификатот.
-Сертификат за уредно извршена вакцинација издава државата во која се примени двете дози од било која вакцина. Сертификатот за уредно извршена вакцинација кој го издава нашето Министерство за здравство е прилагоден на препораките на ЕУ за непречено патување на нашите граѓани, истакнуваат од Министерството за здравство.
-Можеби постојат некои клинички истражувања за мешање на вакцините, прва доза со една вакцина, втора доза со друга, но до сега не сме слушнале искуство од ниту една држава дека тоа се прави при имунизацијата на населението против Ковид-19. И да биде тука понудена друга вакцина, нема да прифатиме. Имаме термин за ревакцинација на 20.јуни во Ниш, па повторно ќе одиме во Србија, велат дел од граѓаните со кои разговараше Фактор.
Од страна на Министерството за здравство останува неодговорено и прашањето дали студентите од Македонија кои моментално се на студии во некои од европските земји, а кои во овој период ја примиле првата доза од Фајзер, ќе бидат ревакцинирани тука со таа вакцина, поради тоа што планираат да се вратат во земјава, зошто завршиле со испитите.