Македонија се гуши, не само од високите температури туки и од загадувањето кое е енормно. Речиси во сите скопски населби вчера беше алармантна состојбата со загадениот воздух, а најстрашно беше во центарот на градот, особено на мерното место кај Ректоратот, каде во попладневните часови беа измерени 985 микрограми на метар кубен.
Во скопската општина Карпош синоќа беа измерени 119 мг/м3 од ПМ10 честичките. Во Кичево завчера во 16 часот беа измерени 135 мг/м3 ПМ10, во Тетово во 18 часот со 123 мг/м3 од ПМ10 честичките...
Невладината организација О2 иницијатива синоќа алармираше за невообичаено високите бројки на загаденост на воздухот и во Велес, Тетово, Гостивар, Струмица, Кичево, Куманово, Битола…
Нејасни се причините за ова, бидејќи летото само што почнува, температурите се околу 35 степени, а намалено е нивото на сообраќај низ градовите, велат активистите и ги повикуваат надлежните итно да излезат на терен и да проверат.
