Лидерот на ВМРО-ДПМНЕ Христијан Мицкоски денеска ги повика обвинителството и министерството за внатрешни работи да кажат детали, а ако не кажат, ВМРО-ДПМНЕ јавно ќе ги објави имињата на фирмите и луѓето кои преку фиктивни фактури со помош на УЈП испумпале над 30 милиони евра државни пари.
За сето ова, посочи Мицкоски, ВМРО-ДПМНЕ има писмени документи.
„Тоа преставува можеби би рекол организирана група која што злосторнички се здружила и лесно ги крадела граѓаните, односно го оштетила Буџетот.
А, според наши информации некаде помеѓу 20-30 милиони евра.
Но, внимавајте за тоа што јас го зборувам постојат дури и докази дека лица вработени во Управата за јавни приходи се повикувани во министерството за внатрешни работи да дадат свој исказ за тоа што јас вчера го зборев.
Затоа е многу важно дали МВР ќе излезе со детали, и ќе го спроведува Законот заедно со Обвинителството за организиран криминал или ние тоа ќе го направиме, ќе го обелодениме во јавноста и тоа во детали со имиња и со точни фирми кои што се дел од ова би рекол злосторничка здружина“, истакна претседателот на ВМРО-ДПМНЕ, проф. д-р. Христијан Мицкоски при посета на општина Радовиш во рамките на активноста „Промените се случуваат, секогаш со народот“ одговарајќи на новинарско прашања во врска со аферата за фиктивно испумпување на пари од УЈП.
Мицкоски додаде дека во аферата се вплеткани високи функционери на СДСМ и ДУИ.
„Злосторничката здружина свесно се здружила со намера да го оштети Буџетот.
А, според нашите информации таму се вплеткани високи функционери на СДСМ и ДУИ.
Ако ме прашувате како тоа функционирало еве ќе се обидам да објаснам, имаме субјект А која што е инстант компанија и која што генерира фиктивни побарувања од УЈП за поврат на данок на додадена вредност, и фирма Б односно субјект Б кој што долгува на УЈП по основ на данок на додадена вредност.
Фирмава А инстант компанија отворено со фиктивни фактури и приоѓа на фирмава Б и и вели дај да се прибиеме со цесија односно нити тие мене да ми вратат, нити вие да платите.
Нормално, со определен надомест. И тогаш што се случува?
Тие се прeбиваат ниту овие што должат на Управата фирмата Б плаќа, нити фирмата А добива официјално поврат на ДДВ, а фирмата Б нормално за одреден надомест ја прифаќа оваа услуга од фирмата А.
Tоа е суштината, и на тој начин никој од Управата поточно од скопската дирекција, тука можеби детали може да ви каже и една актуелна пратеничка на СДСМ која што сега е пратеник, а порано беше директор на скопската подружница на Управата за јавни приходи.
Или пак има еден господин кој што доаѓа мислам дека општина Ранковце близок до поранешен висок функционер на СДСМ, а сега министер можеби тој кој што е сега актуелен директор на скопската дирекција на УЈП може да ви каже детали.
Или пак самата директорка на УЈП или нејзиниот заменик може да ви ги каже деталите“, нагласи Мицкоски.
Мицкоски посочи дека фактот е дека денеска граѓаните се сведоци на сериозно голем криминал во кој што од 20 до 30 милиони евра се во прашање. 20 до 30 милиони евра е оштетен Буџетот, а директно се оштетени преку Буџетот и граѓаните на тој начин. Односно високи функционери на СДСМ и ДУИ се вмешани.
„Го повикувам МВР, го повикувам Обвинителството за организиран криминал да излезат со имиња, со јасна и прецизна динамика како ќе се спроведе законот за овој криминал и за оваа пљачка.
Во спротивно ако тие не го сторат, ние јавно ќе ги обелодениме фирмите и начинот на кој што сето е ова правено и кои се тие високи партиски функционери кои што учествувале и од ДУИ и од СДСМ“, рече Мицкоски.
СДСМ соопшти дека како што и јавно објави УЈП, станува збор за утврдено незаконско работење сторено од одредени даночни обврзници кое УЈП го открило уште во јули 2021 година при што сите документи и материјали се доставени до надлежните институции и предметот е веќе во предистражна постапка.
