Митко Чавков екс директор на БЈБ ноќта ја поминал во штипската модуларна болница, и попладнево е веќе спроведен во приватна болница во Скопје.
Ова го потврдува Директорот на Затвор-Штип, Мики Тодоров за МИА, според кого вчера откако му се влошила здравствена состојба на Чавков и имал ниска сатурација при прегледот од затворскиот лекар, веднаш е хоспитализиран во модуларната болница, каде што добил и постојана кислородна поддршка.
На барање на семејството и по препорака на штипските инфектолози Чавков е спроведен до приватната болница на болнички третман.
Деновиве во штипскиот Затвор кластерот се зголеми со уште двајца новозаразени осуденици, со што бројката се искачи на седум. Меѓу позитивните на коронавирусот се и поранешниот началник на специјалните полициски сили, Митко Пешов и Никола Митревски-Кољо.
Според затворскиот лекар, здравствената состојба на останатите осуденици е добра и се изолирани во три посебни простории.
Инаку, 13 осуденици поради контакт со заразените се во изолација, засега немаат пројавено симптоми на коронавирусот.