Целта на настанот беше да се зголеми видливоста на лицата со попреченост, тие да се зближат со заедницата и директно да се вклучат во активностите посветени на нив. Во културно-уметничката програма настапија ученици од основните училишта, членови од литературниот клуб „Копнеж“, а присуствуваа и инклузирани ученици и членови од здруженијата на лица со попреченост.
– Не сакаме само еден ден во годината да им посветиме внимание на луѓето на кои им е потребна поддршка, туку тоа го правиме постојано. Имаме изработено стратегија и социјален план, мапирани се лицата со посебни потреби, отворен е дневен центар за згрижување, а работи и посебна паралелка во основното училиште „Малина Попиванова“. Имаме 325 лица со посебни потреби над 26-годишна возраст, од кои 38 се невработени, а околу 80 отсто од мапираните лица имаат потешкотии со затоплувањето на своите домови. Една третина од родителите на деца со посебни потреби не се работно ангажирани, а околу 40 отсто од лицата имаат потреба од поддршка во својот дом. Се трудиме сето ова да го подобриме, но морам да признаам дека сè уште е недоволно, истакна градоначалникот на Кочани, Љупчо Папазов.
Настанот беше збогатен со продажни штандови на ракотворби од здруженија на граѓани и од ученици, а се продаваа и уметнички слики изработени на ликовните колонии што во изминатиот период се одржаа во Кочани. Собраните средства ќе бидат наменети за набавка на асистивна техника за лицата со попреченост, а дидактички и нагледни средства за учениците донираше и компанијата „Амфенол Технилоџи Македонија“.