Кралот Чарлс Трети му наредил на принцот Ендру, војвода од Јорк, да ја напушти Бакингемската палата, а неговите работи во текот на реновирањето на палата се однесени, пренесуваат британските медиуми.
„Прво минатата година е затворена неговата канцеларија, а после тоа и одаите за спиење“, изјавил неименуван извор за британски „Sun“.
Ендру ги сакал своите одаи во Бакингемската палата каде живеел брачен живот со Сара Фергусон, со која се оженил во 1986-та година, а тие биле и негово љубовно гнездо по разводот во 1996-та година, наведува весникот.
„Во своите одаи во палатата носел многу нови девојки, меѓу кои била и манекенката Каприс. Станот во Палатата Свети Џејмс го нема истиот шарм за слободен маж“, заклучил извор за весникот „Sun“.
Принцот Ендру претходните години се нашол во центарот на скандалот Епстин и бил обвинет за сексуално злоставување поради што се повлекол до јавниот живот. Во ноември 2022-ра година ја изгубил и платената полициска заштита од Бакингемската палата.
Војводата од Јорк е обвинет за сексуално злоставување на Американката Вирџинија Џуфри кога имала само 17 години. Таа во јавност изнела тврдења дека принцот ја нападнал во Лондон и во САД.
Тужбата на Американката се повикува на Законот за жртви на деца од 2019-та година, кој ги проширил правата на жртвите да ги тужат злоставувачите и поради застарени наводи.
