Месото одгледано во лабораторија може да стане реалност во некои ресторани во САД уште оваа година. Раководните лица на месните компании се оптимисти дека месото произведено во масивни челични контејнери би можело да се најде на менито за неколку месеци, откако една компанија доби зелено светло од голема регулаторна агенција.

Во демонстрација на самодоверба, некои од нив најмиле познати готвачи како Аргентинецот Френсис Малман и Шпанецот Хозе Андрес за да го воведат ова месо во своите луксузни ресторани во догледно време.

Сепак, за да стигне до својата крајна дестинација – полиците на супермаркетите – месото одгледано во лабораторија се соочува со големи пречки, изјавија директорите за Ројтерс. Компаниите треба да привлечат повеќе финансии за да го зголемат производството, што би им овозможило да ги понудат своите пилешки гради и свински шницли по поприфатлива цена. Попатно, тие треба да го надминат отпорот на некои потрошувачи дури и да пробаат месо одгледувано во лабораторија.

Култивираното месо произведено во лабораторија и машини се добива од мал примерок од клетки собрани од добиток, кој потоа се третира со хранливи материи, се одгледува во огромни челични садови наречени биореактори и се преработува во нешто што изгледа и има вкус на вистинско месо.

Само една земја, Сингапур, досега одобрила ваков производ за продажба на мало. Сепак, Ројтерс посочува дека САД ќе го следат примерот. Американската администрација за храна и лекови (ФДА) во ноември објави дека култивираниот месен производ – пилешки гради одгледувани од калифорниската компанија UPSIDE Foods – е безбеден за човечка исхрана.

Директорите на компанијата изјавија за Ројтерс дека сега се надеваат дека нивниот производ ќе биде достапен во рестораните веќе оваа година

Кланица без колење

Во објектот на UPSIDE во Емеривил, Калифорнија, работниците во лабораториски мантили надгледуваат огромни садови со вода и хранливи материи преку екраните, пренесува британската агенција. Месото се зема и се обработува во просторија која извршниот директор Ума Валети ја нарекува „месара без колење“, каде што се проверува и се тестира.

За време на посетата, новинарите на Ројтерс имаа можност да го пробаат пилешкото и рекоа дека кога е сварено има вкус на обично пилешко, иако е нешто потенко и има потемна боја кога е сирово.

Валети изјави за Ројтерс дека компанијата соработувала со ФДА четири години пред да добие зелено светло во ноември.

„Ова е историски момент за индустријата“, рече тој.

Калифорниската месна компанија GOOD Meat веќе поднела барање за одобрување од FDA, а директорите на уште две компании, холандската Mosa Meat и израелската Believer Meats, изјавиле дека се во преговори со агенцијата.

Одобрувањето на регулаторната агенција е само првата пречка за да се направи достапно на пошироката јавност месото одгледано во лабораторија, изјавија директорите на компанијата за Ројтерс. Според нив, најголемиот предизвик е развивање на синџир на снабдување за мешавината на хранливи материи за да се хранат клетките и за масивните биореактори потребни за производство на големи количини култивирано месо.

Европската унија, заедно со Израел и другите земји, исто така работи на регулаторни рамки за лабораториски одгледувано месо, но тие не одобрија никакви производи за човечка исхрана.

Компаниите за вештачко месо планираат да им претстават на потрошувачите дека нивниот производ е поеколошки и поетички од конвенционалното месо, додека се обидуваат да ја надминат одбивноста што некои потрошувачи ја имаат кон нивниот производ.