ДОСТАВУВАЧ починал во своето возило вчера откако работел седум дена во неделата, понекогаш и по 14 часа на ден, во пресрет на црниот петок. Ворен Нортон почина на 49-годишна возраст, а за време на работата се обидуваше да достави што е можно повеќе пакети пред 25-ти ноември.

Него го пронајдоа неговите колеги, наведнат над воланот на комбето паркирано во складиштето на ДПД во Дартфорд.

“Ворен френетично работеше за да испорача што е можно повеќе пакети. Менаџерите ве повикуваат да работите повеќе денови и да останете подолго бидејќи знаат дека сте самовработени. Пакетите мора да се испорачаат по секоја цена”, изјавил неименуван извор за The Sun.

Отпрвин мислеле дека заспал во комбето
Вработените во службата за испорака кои го пронашле првично мислеле дека заспал во комбето поради исцрпеност. Му тропале на прозорецот, но тој не реагирал. Кога виделе дека не се движи, доставувач го скршил прозорецот на возилото. Откако ја отвориле вратата, Нортон паднал од комбето.

Колегите и надлежните служби се обиделе да го оживеат, но не успеале и на лице место била констатирана смрт. Нортон работеше за ДПД околу две години и има 14-годишна ќерка.

„Нашите мисли се со неговото семејство и пријателите“, рече портпаролот на ДПД.