Американската вселенска агенција НАСА ги објави деталите за револуционерните роботски лендери, беспилотни летала и лунарни возила кои треба да го подготват теренот за изградба на постојана човечка база на Месечината. Меѓу избраните партнери за овој мегапроект се најде и компанијата „Блу Ориџин“ на милијардерот Џеф Безос, соопштува BBC News.
Белата куќа има јасна амбиција да ги врати американските астронаути на лунарната површина пред претседателот Доналд Трамп да го заврши својот мандат во 2028 година. Но, притисокот е огромен бидејќи Кина гази со полна пареа кон истата цел – Пекинг планира слетување на Месечината најдоцна до 2030 година, а веќе го лансираше и вселенското летало „Шенжоу-23“ со нов екипаж кон својата вселенска станица „Тиангонг“.
Проект од 20 милијарди долари: „Никогаш повеќе нема да ја напуштиме Месечината“
НАСА веќе стави на маса буџет од 20 милијарди долари за изградба на постојана база на јужниот пол на Месечината до 2032 година, која ќе се напојува со комбинација од нуклеарна и сончева енергија. Првиот човек на НАСА, Џаред Исакман, самоуверено изјави дека со овие планови САД гарантираат дека „никогаш повеќе нема да ја напуштат Месечината“.
Идниот лунарен дом ќе послужи за клучни научни експерименти, ископување на вредни ресурси, но и како отскочна штица за историското патување кон Марс.
Времето тече, а експертите се скептични
И покрај големиот оптимизам и успехот на мисијата „Артемис II“, во која четири астронаути неодамна летаа околу Месечината, повеќето вселенски експерти сметаат дека роковите на НАСА се премногу оптимистични и нереални.
Поради сложеноста на технологијата што допрва треба да се тестира, добар дел од научната заедница типува дека Кина има многу постабилен план и дека веројатно таа ќе победи во оваа трка, станувајќи следната нација која ќе остави човечки стапалки на лунарното тло.
© Vecer.mk, правата за текстот се на редакцијата
