Во животот, никогаш не знаете кога ќе ви пријде некој што ќе го сретнете само за по едно кафе, со раширени раце, влегувајќи во прегратка.
Вашите опции се ограничени: Може непријатно да го избегнете гестот, да подадете рака или да се подложите на несаканата прегратка.
Пред да размислите, запомнете дека некои луѓе едноставно не сакаат да бидат допрени од други и дека има добри причини за тоа.
Без разлика дали сте за или против прегратка, еве зошто некои луѓе едноставно не сакаат да се гушкаат:
Експертите велат дека ова има врска со начинот на кој растеле.
„Нашата подготвеност за физички контакт, без разлика дали станува збор за прегратки, тапкања на рамо, држење за раце и слично, обично ги рефлектира нашите искуства од раното детство“, објаснува д-р Сузан Дегис-Вајт од Универзитетот во Северен Илиноис.
„Студија од 2012 година покажа дека луѓето кои пораснале во семејства во кои прегратките биле дел од секојдневниот живот, едноставно ја продолжуваат таа традиција. Наодите од ова истражување исто така покажаа дека прегратките се важен елемент во емоционалниот развој на децата“.
Но, децата кои родителите не ги прегрнувале доволно во детството, честопати се чувствуваат непријатно во ситуации кога некој ги гушка.
Во семејства кои физички не покажале љубов, нежност и блискост, растат деца кои подоцна продолжуваат да ја следат оваа шема, дури и по формирање на сопствено семејство.
И така, од генерација на генерација, растат воздржани луѓе кои не сакаат да се гушкаат.
Од друга страна, понекогаш растењето без доволно прегратки може да има сосема спротивен ефект.
Ако некое лице пораснало копнеејќи за допир и физичко изразување на блискост и љубов, може да се случи подоцна да се обиде да „компензира“ на одреден начин, гушкајќи ги луѓето веднаш штом се појави можност.
Се разбира, постојат и културолошки разлики, истражувањата од 2010 година покажаа дека луѓето во Америка и Англија, на пример, се гушкаат и допираат забележително помалку отколку, да речеме, жителите на Франција и Порторико.
Општо е подобро да се прескокнуваат прегратките, ако не станува збор за луѓе со кои сте навистина блиски. Бидејќи, без оглед на фактот дека прегратката е најприродната работа на светот за вас, не секој се чувствува исто по тоа прашање.
