Појадокот е еден од главните оброци и затоа е многу важно да се избере она што е навистина квалитетно и хранливо. Со него го поттикнуваме метаболизмот и варењето, а она што нашите баби многу добро го знаеле е колку пченкарното брашно е корисно за нашиот организам.
Затоа често приготвувале специјалитети како пројички, а и денес често ги има на семејните трпези. Денеска ви носиме рецепт за супер вкусен појадок, кој брзо се подготвува.
Потребно е за 8 лица:
- 4 филџани пченкарно брашно
- 2 филџани бело брашно
- 2 лажички сол
- 1 кесичка прашок за печиво
- 4 јајца
- 100 мл масло
- 6 големи лажици ајвар
- 200 мл јогурт
- 400 мл млеко
Начин на приготвување: Земете длабок сад и во него прво ставете ги јајцата и изматете ги. Потоа додадете ги останатите состојки и повторно добро измешајте со миксер. Калапот за проички намачкајте го со масло и истурете ја смесата до половина од калапот. За време на печењето малку ќе пораснат и ќе го пополнат празниот простор. Се пече во загреана рерна на 200 C. Одозгора посипете сусам, семки од тиква и семки од сончоглед и уживајте во вкусен и здрав појадок.
