Домашните кифлички – без разлика дали се слатки и полнети со џем или крем или солени и со сирење, ајвар или спанаќ – се секогаш добро решение! Ова вкусно домашно печиво е одлична идеја за брз појадок или вечера, за ужина што ќе ја однесете на работа или како послужување за гости. И она што е најважно, не треба да потрошите многу време за подготовка, дури ниту да чекате тестото да нарасне!
Сè што треба да направите е да го следите ова упатство, чекор по чекор!
Потребни состојки:
- половина килограм брашно
- 20 г квасец
- 50 мл масло
- 250 мл топла вода
- 1 лажичка шеќер
- 1 лажичка сол
- маргарин
- сусам по желба
Начин на приготвување: Во поголем сад издробете го квасецот, потоа додадете шеќер и малку млака вода и сè убаво измешајте. Истурете малку масло и 1 лажичка брашно, па измешајте и постепено додајте го остатокот од брашното и солта. Месете додека не добиете мазно тесто. Расукајте го додека не добиете круг дебел околу 3 милиметри, па исечете го на 16 триаголници. Секој филувајте го по желба и виткајте во ролати. Растопете го маргаринот, па со него премачкајте ги кифличките и посипете ги со сусам по вкус. Печете околу 20 минути во рерна загреана на 200°C.
