Платил две евра за еспресо, па повикал полиција: Кафулето казнето - со 1.000 евра
Изнервиран маж повикал полиција откако платил две евра за еспресо без кофеин во кафулето „Ditta Artigianale“ во Фиренца.
Тој се пожали во полиција дека цената не е јасно истакната зад пултот.
На крајот, таа грешка ги чинеше газдите казна за локалот кој е познат по доброто кафе и по освоени награди , пренесува РТС.
Сопственикот Франческо Санапо луто ја коментираше казната на социјалните мрежи и го бранеше кафето што го нудат, а кое доаѓа од мала плантажа во Мексико и „со големо внимание го подготвуваат неговите баристи“.
„Ме казнија затоа што некој се навреди што платил две евра за кафе. Дали ви се верува? Денеска секој може да се изнервира и да ја мобилизира полицијата која ќе не казни за застарениот закон“, рече Санапо, држејќи писмо од полицијата.
Во Италија просечната цена на еспресото е едно евро, иако повеќето кафулиња и барови неодамна ги зголемија цените поради проблеми со снабдувањето и повисоките цени на кафето.
Групите за заштита на потрошувачите предупредија дека просечната цена на еспресото оваа година би можела да порасне до 1,5 евра, пишува Гардијан.