Поради прекршување на маркетиншките ограничувања поврзани со употребата на швајцарски заштитни знаци, сликата на планинскиот врв Матерхорн ќе мора да се отстрани од етикетата Тоблероне кога дел од производството на чоколадната лента ќе биде преместена надвор од Швајцарија. Планината висока 4.478 метри, чиј речиси симетричен пирамидален врв го отсликува обликот на чоколадна лента со бадеми и мед, ќе биде заменета со типичен алпски врв, најави американскиот сопственик на кондиторскиот бренд Mondelez.
- Редизајнот на амбалажата воведува модернизирано и поедноставено планинско лого кое е во хармонија со геометриската и триаголната естетика - изјави портпаролот на Монделез за весникот Aargauer Zeitung. Исто така, на пакувањето Тоблероне веќе нема да биде дозволено да пишува „Made in Switzerland“. Законот за заштита на „швајцарството“ од 2017 година ја ограничува употребата на белиот крст на националното знаме на црвена позадина, како и други показатели за швајцарско потекло во храната и индустриските производи и услуги, пишува Гардијан.
За да може прехранбените производи да се пласираат под покровителство на „made in Switzerland“, 80% од суровините мора да потекнуваат од таа земја, а најголем дел од преработката мора да се одвива таму. За млечните производи, процентот на швајцарски состојки мора да биде 100%, освен оние што не можат да се произведуваат во Швајцарија, како што е какаото. Истражувањата покажаа дека одредени производи означени како „произведено во Швајцарија“ се продаваат по цена за 20% повисока од споредливите стоки од друго потекло, а продажната цена се зголемува за дури 50% за луксузните артикли.
Од 1908 година, Тоблероне се произведува во швајцарската престолнина Берн, а мечката, која е симбол на градот, е внатре во сликата на Матерхон на пакувањето. Чоколадото го добило името по комбинацијата на презимето на нејзиниот пронаоѓач Теодор Тоблер и тороне, деликатес направен од нугат и пржени бадеми типични за божиќните обичаи во југозападна Европа.
Тоблероне се најде на насловните страници во 2016 година кога го зголеми растојанието помеѓу триаголните чоколадни парчиња на шипките што се продаваат во ОК, наводно за да може да ги продава грицките по иста цена, но со намалена тежина од 170 на 150 грама. Една година подоцна, Mondelez исто така ја намали тежината на коцките Тоблероное што се продаваат во Германија, „намалувајќи“ го бројот на триаголни врвови од 15 на 11.
Ваквите „контроверзии“ донесоа бесплатен маркетинг на Тоблероне, а продажбата се зголеми и покрај бесот на клиентите. Во 2018 година, чоколадната лента се врати во првобитната форма. Корпорацијата Mondelez, која е сопственик на Тоблероне од 2012 година, минатата година објави дека од крајот на 2023 година ќе префрли дел од производството во својата фабрика во Словачка, каде што веќе произведува чоколадо Милка, исто така оригинално произведено во Швајцарија.
