Кризниот штаб на владата на Србија одлучи за викендот што претстои да биде затворено сѐ на цела на територија на државата, освен продавниците со храна, аптеките и бензинските пумпи.

Ова на прес-конференција по седницата го соопшти покраинскиот секретар за здравство, Зоран Гојковиќ.

Што се однесува до следната недела, Гојковиќ рече дека продолжува онлајн наставата во средните училишта, а во соработка со Министерството за образование, и учениците од петто до осмо одделение ќе бидат префрлени на часови на далечина.

Учениците од пониските одделенија во основните училишта, пак, ќе продолжат со наставата како и досега.

Оваа викенд-мерка е слична на минатонеделната кога, поради верскиот празник, затворањето на сите објекти, освен тие за храна, аптеките и бензинските пумпи, беше од сабота напладне.

За медицинскиот дел од Кризниот штаб овие мерки се недоволни и бараат затворање на кафеаните во текот на целата недела поради растечкиот број на новозаразени кои во последно време се движат меѓу 3 и 4 000 дневно.