Силна експлозија се случи синоќа во селото Варага во Зубин Поток, северно Косово, од која е оштетен водоснабдувачкиот систем Ибар-Лепенец во тој регион, јави дописникот на МИА од Приштина.
Веста во изјава за медиумите ја потврди заменик директорот на косовската полиција за северниот регион, Ветон Елшани.
- Да, се слушна експлозија во каналот за вода и полициските екипи работат на што поскоро расчистување на случајот, изјави Елшани.
Извори од косовското обвинителство изјавија за ТВ Коха дека првичните сомнежи се оти експлозијата имала за цел „да ја оштети критичната инфраструктура на Косово со цел да го блокира протокот на вода што се користи за ладење во процесот на производство на електрична енергија во термо-електраните Косова А и Косова Б“.
Регионалното водостопанство „Митровица“ соопшти дека е прекинато снабдувањето со вода за пиење поради оштетување на дел од каналот Ибар-Лепенец. Претпријатието ги повика граѓаните да обезбедат резерви на вода за пиење.
Во последните два дена имаше уште неколку инциденти на косовскиот север, населен со мнозинско српско население. Во Звечан бомби беа фрлени врз полициската станица и во дворот на општината. По овие два напади, косовската полиција вчера соопшти дека ги зголемила безбедносните мерки на ниво на државата.
Полиција на Косово: Експлозијата во каналот Ибар-Лепенец е терористички чин
Косовската полиција во соопштение по нападот на водниот канал „Ибар-Лепенец“ кај Зубин Поток во северно Косово, соопшти дека е нападната критичната инфраструктура на земјата, а од увидот на стручни тимови на местото на настанот е заклучено дека експлозијата била намерна, што го прави овој напад терористички и криминален чин, јави дописникот на МИА од Приштина.
Полицијата соопшти дека нејзини експертски тимови веднаш излегле на местото на настанот и за случајот ги известиле сите надлежни институции, итната помош, Водоводот, претпријатието Ибар-Лепенец и Косовската енергетска корпорација.
„Од страна на косовската полиција и надлежните институции се преземени неопходните безбедносни мерки за запирање на протокот на вода, како и можноста за санација на водниот канал. Истовремено, единицата за справување со експлозивни материјали, врши интензивни увиди и испитувања на местото на настанот, од каде е констатирано дека експлозијата/детонацијата била намерен напад, извршено терористичко кривично дело од осомничено лице, односно лица“, се вели во полициското соопштение.
Во тек е координацијата на акциите на терен од страна на институциите на Косово, а во врска со случајот се известени и меѓународните безбедносни институции.
„Косовската полиција ги засили безбедносните мерки на чувствителните локации и ќе продолжи интензивно да работи на расветлување и расветлување на случајот за кој од првичните истраги постои сомнение врз основа на тоа дека нападот бил намерен и извршен со експлозив од поединец или криминална група, причинувајќи голема материјална штета“, се наведува во соопштението.
„Косовската полиција ќе ги искористи сите вештини и помош од меѓународната заедница за да ги истражи доказите и да ги пронајде одговорните за штетите на водоснабдувањето на земјата, снабдувањето со електрани и Зубин Поток, што може да им наштети на граѓаните. Заедно ќе се обидеме да ги најдеме одговорните за овој случај и за другите напади врз полициската станица во Звечан и зградата на општината“, соопштија од полицијата.
Вчера во доцните часови се случи силна експлозија, која го оштети каналот Ибар-Лепенец во Зубин-Поток. Регионалното водостопанство „Митровица“ соопшти дека го прекинало водоснабдувањето.
Во последните два дена имаше уште неколку инциденти на север. Во Звечан, една од општините со мнозинско српско население во северно Косово, беа фрлени рачни бомб, во вторникот врз полициската станица, а во четвртокот вечерта и во дворот на општината.
По ова, полицијата на Косово во петокот соопшти дека ги зголемила безбедносните мерки низ државата.
© Vecer.mk, правата за текстот се на редакцијата
